العاشق العراقي نــــائب المديــــر
عدد الرسائل : 157 العمر : 34 الموقع : ad_sammer2007@hotmail.com اوسمة : تاريخ التسجيل : 16/02/2010
| موضوع: بعض المعلومات عن اسماك الزينه الجمعة فبراير 19, 2010 2:17 am | |
| تعـــــــرف علــى سمكـــة الاوسكـــــــار
تعريف عام بسمكة الاوسكار --------------------------------------------- الاسم العلمى : Astronotus Ocellatus وهو يعنى السمكة ذات العلامة كالنجمة من الخلف وتنتمى سمكة الاوسكار لعائلة السيكلد ويطلق ايضا على سمكة الاوسكار اسم velvet وهو يعنى السمكة ذات الملمس القطنى او المخملي الناعم والطريف ان لا احد يعلم لماذا سميت بالاوسكار حتى الان ولكن يطلق على سمكة الاوسكار فى وسط الهواة اسم river dog اى كلب النهر وذلك بسبب تصرفات السمكة اثناء اطعامها فهى تتعرف بسهولة على من يطعمها ثم تفتح فمها لالتقاط الطعام مثل الكلب تماما فهى سمكة ذكية جدا جدا مثل الكلب وغالبا ما تصنف سمكة الاوسكار ضمن الاسماك المفترسة وذلك لانها تحب ان تأكل الاسماك الحية الاصغر منها حجما ولكنها من وجهة نظرى سمكة مسالمة جدا جدا فانظر لها عندما يتم تغيير ماء الحوض ستراها كائنة فى القاع دون اى حركة مسالمة جدا وخائفة فكيف لها ان تكون مفترسة وعلى فكرة سمكة الاوسكار سمكة مزاجية جدا يعنى ممكن تكون فرحانة ومبسوطة وفى ثانية تضايق من ابسط حاجة زى مثلا الحركة الكتيرة قدام الحوض والازعاج كل شوية عن طريق تحريك المياة بايدك عشان كدة سمكة الاوسكار بتحب تعيش فى هدوء تام بدون ازعاج و سمكة الاوسكار معروف عنها انها لما تكون مبسوطة الوان جسمها بتظهر وبتبقى شكلها جميل جدا ولما تكون زعلانة ومتضايقة الوان جسمها بتبهت وبيبقى شكلها مش حلو ------------------------------------ الموطن الاصلى : نهر الامازون وهو ثانى اطول انهار العالم بعد النيل فى مصر -------------------------------------------- الحجم : يصل حجم الاوسكار الى 40 سم وبالتحديد 16 inch inch = 2.54cm 16 * 2.54 = 40.64cm وذلك لآن اسماك الاوسكار تعد من الاسماك المعمرة حيث يمتد عمرها من 10 إلى 15 سنة ولهذا يفضل هواة تربية الاسماك اقتنائها ويعتقد بعض الاشخاص ان الاوسكار قد يعيش من 15 الى 20 سنة ولكنى بحثت عن هذة المعلومة ووجدتها معلومة خاطئة تماما ------------------------------------- حجم النضج : تدخل سمكة الاوسكار فى مرحلة النضج فى عامها الثانى حيث يصل حجمها من 23 إلى 26 سم اقصى حجم لسمكة الاوسكار: يعد الوصول الى اقصى حجم لسمكة الاوسكار وهو 40.64cm هو تحدى لجميع هواة تربية سمكة الاوسكار لان المعروف فى وسط الهواة ان سمكة الاوسكار تصل فقط لاقصى حجم لها فى بيئتها الطبيعية وليست فى احواض التربية وانا شخصيا نهى Dreams Princess قبلت هذا التحدى فى احدى المنتديات الاجنبية المتخصصة بسمكة لاوسكار وانا اعمل حاليا على تحقيق هذا التحدى والوصول باسماكى الى هذا الحجم ان شاء الله تعالى ---------------------------------------
درجة الحرارة : يفضل درجة حرارة متوسطة وهى 25 ولكن تستطيع سمكة الاوسكار تحمل الحرارة من 23 إلى 28 درجة مئوية درجة الحموضة (PH) : من 6 إلى 7.5
انواع سمكة الاوسكار : يوجد انواع كثيرة لسمكة الاوسكار منها
Tiger Oscar Red Oscar Albino Oscar Red Tiger Oscar Lemon Oscar
وغيرها من الانواع
طبعا مش كل الانواع دية موجودة فى الطبيعة ولكن تم تهجينها واستزراعها فى الاحواض حيث يوجد نوع واحد فقط موجود فى الطبيعة وهو نوع شبية بال Tiger Oscar وتم استخراج وتهجين كل هذة الانواع من هذا النوع الرئيسى وكانت اول عملية تهجين ناجحة كانت على يد رجل اعمال تايلندى وكان الناتج هو الاوسكار الاحمر وكانت هذة هى اول عملية تهجين حوض سمكة الاوسكار ------------------------ خطأ شائع يقع فية معظم هواة تربية اسماك الزينة وهو وضعهم سمكة الاوسكار فى حوض صغير اعتقادا منهم انها لن تحتاج الى المساحة الكبيرة وهذا بالطبع اعتقاد خاطىء تماما فالعنصر الاساسى التى تعتمد علية سمكة الاوسكار فى النمو هوة المساحة تخيل مش الطعام يعنى لو عندك سمكة اوسكار فى حوض صغير وفضلت تأكل السمكة كل يوم بكميات كبيرة سيظل حجمها كما هو ولهذا يفضل ان يكون الحوض 100 * 45 * 45 اما ارضية الحوض او الجرش فيفضل ان يكون جرش ناعم لان الاوسكار بيحب الحفر فى الارضية فايفضل وضع جرش ناعم عشان فم الاوسكار مايتجرحش اما بخصوص الزرع فأى زرع هايتحط للاوسكار هايتشال من جذورة لان دية هواية الاوسكار المفضلة وهى خلع الزرع من جذورة وفى بعض الناس بتحب تحط الزرع مع الاوسكار من باب الترفية عن الاوسكار لآن دية هوايتة ولعبتة المفضلة وطبعا ماننساش الكهوف لازم يكون فى كهف كبير فى الحوض عشان الاوسكار بيحب جدا يحس بالامان داخل الحوض وبيحب يدخل الكهف وينام فية واحنا ممكن جدا نستخدم الاوانى الفخارية او مواسير البلاستيك لصنع كهف ملائم لسمكة الاوسكار وياريت نحط فى القاع بعض الصخور المسطحة لكى نعطى انطباع بقاع نهر الامازون وهى البيئة الاصلية لسمكة الاوسكار وتذكر كلما استطعنا الوصول الى البيئة الاصلية لسمكة الاوسكار كلما استطعنا الوصول الى اقصى حجم لسمكة الاوسكار
التغذية ------------ فى البيئة الطبيعية تتغذى سمكة الاوسكار على الحشرات والقشريات وبعض الاسماك الحية الصغيرة ولكن فى البيئة الصناعية الى هى حوض السمك بتفضل سمكة الاوسكار أكل جميع الاصناف التى تحتوى على البروتين وافضلها اللحوم طبعا مثل الدود واللحوم المجمدة والجمبرى والكبدة مع انى مش بفضلها شخصيا عشان الكبدة عبارة عن دم متجمع وليست لحم فأول لما بتنزل المياة بتتفاعل مع المية وبتبدى تتفكك وبالتالى بتعكر المية وبتعمل رائحة مش كويسة ويقوم بعض الهواة بتسوية الكبدة قبل وضعها لسمكة الاوسكار عن طريق وضعها فى مياة مغلية لمدة دقيقة واحدة وذلك للتخلص من الدم والرائحة وفعلا سيتم التخلص من الدم والرائحة ولكن الاوسكار لن يحبها بهذة الطريقة لانة تم التخلص من الدم وهو العنصر الاساسى الذى يفضلة الاوسكار انا شخصيا بحب جدا أأكل الاوسكار سمك حى مثل الجولد الذهبى وذلك لسببين اولا : الاوسكار بيموت فى حاجة اسمها سمك صاحى صغير ثانيا : سمكة الجولد الذهبية سمكة رخيصة حيث لا يتعدى ثمنها 50 قرش للسمكة الواحدة ملحوظة : أحيانا من وقت لأخر تمتنع الأوسكار عن الأكل لمدة أسبوع أو إثنبن فهذة عادة من عادات سمكة الاوسكار فلا تقلق
تفريخ سمكة الاوسكار ------------------------- طبعا فى البداية لازم تعرف تفرق بين الذكر والانثى ويؤسفنى انى اقولك انة لحد دلوقت مفيش حد بيعرف يفرق بينهم هتقابل ناس تقولك بص على البقعة الصفراء الى على الذيل لو كبيرة يبقى ذكر لو صغيرة تبقى انثى وهتقابل ناس تقولك بص على الذعنفة الذيلية لو كاملة الاستدارة تبقى انثى ولو مش كاملة الاستدارة تبقى ذكر وهتلاقى ناس اذكى من كدة هاتقولك سيبك من كل الكلام دة انت تشوف اتنين ماشيين مع بعض ديما مع بعض يبقى علطول دول هايبقوا ذكر وانثى لكن المفاجأء الغريبة ان بردة دة مش دليل ممكن يبقوا الاثنين ذكر أو الاثنين انثى ولمجرد تواجدهم مع بعض فى نفس البيئة اتصاحبوا على بعض للاسف الى الان لا توجد قاعدة ثابتة للتفريق بين الذكر والانثى لان الاثنين متماثلين تماما فى الشكل وافضل وسيلة اذا اردت ان تقوم بتفريخ الاوسكار هى شراء مجموعة من اسماك الاوسكار فى عمر صغير ويكون العدد زوجى حتى تكون فرصة ايجاد ذكر وانثى كبيرة وسط المجموعة بالبلدى انت هاتشترى مجموعة من سمك الاوسكار ولنفرض 10 سمكات صغيرة تقريبا بالعمر والحجم دة
وتقعد تربى فيهم هتلاقى بعد فترة كل سمكة هاتختار سمكة تانية هاتبقى ملاصقة ليها فى كل مكان للحوض وخليك فاكر دة بردة مش دليل انهم ذكر وانثى انت هاتقدر تفرق بينهم فى حالة واحدة فقط وهى حالة وضع البيض ساعتها فقط هاتعرف فين الانثى طبعا الى بتوضع البيض
علامات التفريخ -------------------- قبل التفريخ باسبوعين او شهر او اكثر هتلاقى الزوجين بيعاكسوا بعض عن طريق التقابل بالفم او بالذيل او الحركات العنيفة داخل المياة فى خطأ كبير بعض الهواة بيقعوا فية وهو انهم بيفتكروا الاوسكار بيضرب بعضة فابيفصلوا بينهم بحاجز او فى حوض اخر ودة طبعا خطأ كبير جدا لان لو تم الفصل بينهم كل سمكة بتزداد عنف وممكن تموت من الحزن على السمكة الاخرى هى دية طبيعة الاوسكار العنف قبل التفريخ وللاسف عنف الاوسكار بيتفسر فى الغالب خطأ ايضا ستجد ان الاوسكار بدا فى حفر الارضية وعمل حفرة كبيرة او ابتدى ينظف سطح الصخور العريضة تمهيدا لوضع البيض وتضع انثى الاوسكار من 1000 الى 2000 بيضة ونادرا ما يأكل سمك الاوسكار صغارة يعنى ماتقلقش لآن الحالة الوحيدة الى الاوسكار ممكن يلتهم فيها صغارة بترجع الى قلة خبرة المربى فى التعامل مع غذاء الاوسكار قبل وبعد التفريخ لآن بعض المربين بيفضلوا انهم يأكلوا الاوسكار كبدة نية بكميات كبيرة ودة للاسف بيسبب للاوسكار حالة سعار عشان كمية الدم الكبيرة الى فى الكبدة وبالتالى لو حدث التفريخ فى هذة الفترة فعلا الاوسكار ممكن يلتهم صغارة عشان كدة لازم قبل فترة التفريخ نمتنع تماما عن تغذية الاوسكار بالكبدة وناكلة لحوم عادية مجمدة او جمبرى اى غذاء فية نسبة قليلة من الدماء وعلى العكس سعات المربين بيعتمدوا على الدود فقط كغذاء للاوسكار قبل التفريخ طبعا الدود اغلبة بروتين بس يفتقد لعنصر الدم وهو ما يفضلة الاوسكار وعشان كدة لو حصل التفريخ فى هذة الفترة الاوسكار بيبقى متلهف لآى حاجة فيها دم فابيضطر يلتهم صغارة يعنى سبب التهام الاوسكار لصغارة راجع لطريقة غذاءة عشان كدة لازم يكون المربى عندة خبرة كفاية عشان يقدر يتعامل مع غذاء الاوسكار قبل التفريخ لآن دية فترة مهمة جدا جدا لآنة على اساسها بنقدر نحافظ على صغار الاوسكار والدليل ان الاوسكار اكثر انواع السمك خوفا على صغارها راقب سمكة الاوسكار بعد وضع البيض انظر كيف سيحمى البيض من اى دخيل على الحوض وانظر بعد التفريخ كيف يحمى صغارة سمكة الاوسكار حنينة جدا على صغارها بس للاسف فى ناس بتخاف فعلا على البيض من الاوسكار وبتشيلة من المياة وبتحطة فى حوض تانى مما يتسبب فى حالة نفسية سيئة جدا لسمك الاوسكار لاحساسة بفقدان صغارة وفى الغالب يتعرض البيض للهواء اثناء النقل مما يتسبب فى افسادة وهى دية الحالة الوحيدة الى ممكن الاوسكار يلتهم فيها صغارة بس خلى بالك سمك الاوسكار بعد التفريخ بيكون عصبى وعنيف جداااااااااا ماتحاولش انك تحط ايديك فى المياة خالص او حطها لو كنت مستغنى عنها ههههه بهزر طبعا بس ياسيدى بعد ما يقوم الذكر بتخصيب البيض بتقريبا 36 ساعة بيتم خروج الصغار طبعا بيبقى شكلهم عسول جدااااا ودية بعض الصور بتوضع عملية وضع البيض والتفريخ
وتكون تغذية الولدة كالتالى زى اى سمك لسة مولود بتبتدى بفقس بيض الجمبري ثم بالدود المقطع ثم بالأكل الجاف المطحون جيدا وطبعا بتبدى تطفى الفلاتر عشان تقلل التيارات فى المياة عشان السمك يعرف ياكل ومايموتش من الجوع
ودلوقت هاجاوب على بعض الاسألة الشائعة بخصوص الاوسكار ---------------------------------------------------------------------------------- 1 - الاوسكار بيكبر وبيزيد حجمة كل قد اية ؟
بص يا سيدى المعروف ان الاوسكار مالهوش بردة قاعدة ثابتة للزيادة فى الحجم والدليل انك لو اشتريت مجموعة من سمك الاوسكار وفضلوا عندك لمدة سنة مثلا هتلاقى اختلاف كبير فى احجامهم مع انهم بياكلوا نفس الاكل وعايشين فى نفس البيئة ولكن المتداول فى الوسط انة بيزيد 1 inch كل شهر يعنى 2.54cm كل شهر ودة فى السنة الاولى وبعض الاحيان بيكبر 1inch كل شهر فى اول ستة شهور وبعد كدة بتبتدى سمكة الاوسكار تكبر بصعوبة ولو حسبنا حجم السمكة بالشكل دة هنلاقى انك ممكن توصل لحجم 30cm فى خلال اول سنة ودة محصلش قبل كدة انت ممكن توصل لحجم 6 inch أو 7 inch فى السنة الاولى وبعد كدة هتتباطء عملية النمو فقد تصل السمكة بعد عمر سنتين او ثلاثة الى 9 أو12 inch
2- انا عايز اشترى سمكة اوسكار اعمل اية واختار ازاى ؟
فى البداية لازم تتأكد انك هاتوفرلها البيئة المناسبة زى ما شرحنا قبل كدة دة بالنسبة للبيئة اما بالنسبة لاختيار السمك فتأكد ان افضل شىء عند شراء الاوسكار هوة شراءة فى عمر صغير بحجم لا يتراوح 3inch وهذة هى وجهة نظرى الشخصية لانك ستجد من يقول لك اشترى السمك قبل سن النضج بفترة بسيطة جدا اى فى حجم 7 أو8 inch اى قبل اختيار السمكة لشريكتها وهذا اعتقادا منهم اى الاختيار يتم بعد سن النضج ولكن الحقيقة انة لا احد يعلم بظبط متى تتم عملية الاختيار ولهذا فالاضمن لك هو شراء السمك فى عمر صغير جدا طبعا اذا توافر لك ذلك واذا لم يتوافر فيمكنك تنفيذ هذة النظرية الا وهى شراء السمك قبل سن النضج تماما اى فى حجم 7أو inch 8 وهنا ستواجهنا مرحلتين للشراء ولكل منهما معايير للشراء
اول مرحلة
وهى شراء السمكة فى عمر صغير ساعتها خد بالك وانت بتشترى لازم تختار السمكة النشيطة الى بتتجاوب بسرعة لحركة ايديك لآن الاوسكار فى العمر دة بيبقى نشيط جدا وسريع الحركة وابعد عن السمكة الكسلانة
ثانى مرحلة
وهى لو قررت تشترى السمكة فى عمر كبير بعد او قبل النضج ساعتها خد بالك وانت بتشترى اثناء الفترة دية فى عمر السمكة ممكن تمر بمراحل مرضية اشهرها مرحلة الاصابة بمرض فى الرأس وهو يظهر فى شكل حفر صغيرة فى الرأس طبعا تبعد عن اى سمكة بالشكل دة
اعتقاد خاطىء اثناء الشراء ------------------------------- بعض الاشخاص بيشترى سمكة الاوسكار حسب درجة وضوح لون جسمها دة غلط خالص لآنة مش لازم عشان مثلا السمكة الوانها باهتة انها تكون عيانة او مريضة ولو الوانها واضحة انها تكون سليمة دة اعتقاد خاطىء جدا لانى زى ما وضحت قبل كدة الوان سمكة الاوسكار بتعتمد على الحالة المزاجية للسمكة يعنى لو قدرت توفر ليها افضل بيئة مناسبة بدون ازعاج هتلاقى الوانها واضحة وجميلة ولو ازعجتها وخوفتها هتلاقى الوانها باهتة ومش واضحة وشكل السمكة مش حلو يعنى فى النهاية لا تحكم على سمكة الاوسكار من خلال الوان جسمها
3- بعد شراء سمك الاوسكار ماذا افعل ؟
لازم قبل وضع السمك فى المياء تتأكد من درجة حرارة المياة وهى انها تكون درجة متوسطة 25 وطبعا زى ما بنعمل مع كل انواع السمك الجديد قبل نزولة للحوض هو تعويم كيس السمك على سطح المياة لمدة 15 دقيقة ثم اخذ بعض المياة من الحوض ووضعها داخل الكيس ثم الانتظار قليلا حتى تأخذ درجة حرارة المياة داخل الكيس نفس درجة حرارة المياة داخل الحوض ثم بعد ذلك يتم تفريغ السمك داخل الحوض
4 - سؤال مشهور جدا بعد ان وضعت سمك الاوسكار داخل الحوض نزل الى القاع ومكث دون اى حركة ماذا افعل ؟
دية حاجة طبيعية جدا فى الاوسكار هوة كدة خايف من البيئة الجديدة ودة اسلوبة فى التعبير عن الخوف شوية بشوية هاياخد على الحوض وهتلاقية بيتحرك فى كل مكان اصبر بس علية شوية
5 - سؤال ايضا مشهور جدا ينفع اشترى سمكة اوسكار كبيرة واحدة بس بدون زوج معاها سؤال صعب جدا جدا جدا
لان ساعتها الاجابة هاتختلف حسب نوع السمكة اذا كانت انثى او ذكر ودة تفريقة صعب جدااااااااااا زى ما وضحت قبل كدة لآن لو كانت السمكة الى هاتشتريها ذكر فى هذة الحالة ممكن جدا تعيش لوحدها فى الحوض لآن الذكر بطبيعتة بيحب السلطة والتحكم وبالتالى هايكون سعيد انة لوحدة فى الحوض ولو حاولت تحط معاة اى نوع تانى من الاسماك هايعتبرة دخيل على الحوض وهاتبقى مجزرة ولو كانت انثى فى هذة الحالة متوقع انها تموت لو عاشت لوحدها لآن بطبيعة الانثى بتحب انها تعيش فى صحبة مع ذكر او مع انثى زيها يعنى لو عاشت لوحدها هاتموت من الوحدة يعنى الافضل انك تشترى زوج او مجموعة
6 - طب انا اشتريت اوسكار عايز اربى معاة نوع تانى اربى اية ؟
قاعدة عامة اى نوع سمك يتحط مع الاوسكار ويكون حجمة اصغر من حجم سمكة الاوسكار الاوسكار بيعتبرة فريسة لية وبيطاردة لحد ما يلتهمة اوعى تحط اى نوع سمك مع الاوسكار يكون حجمة اصغر من حجم سمكة الاوسكار يمكنك تربية جميع انواع السيكلد مع سمكة الاوسكار لآنهم من نفس الفصيلة طبعا ولهم نفس الطباع وبيعيشوا تقريبا فى نفس البيئة ولكن توقع بردة قليل من العنف لان دية طبيعة الاوسكار . وبكدة نكون اتعرفنا بشكل عام على سمكة الاوسكار واخدنا خلفية عنها وبقى عندنا خبرة مبدئية نقدر من خلالها نبتدى نربى سمكة الاوسكار وصدقونى مش هاتندموا ابدا
| |
|