تاهت لحون القصيده

يا حياتي ما تبينـه مـن عيونـي تأخذينـه

هذا قلبي بين يديه لـو بغيتـي لـك هديـه

ما يقدم شخص ثاني وأنـتِ اللـي تأمرينـه

وكل نبضٍ قد نبضته بين روحه وبين جيّـه

أنتِ اللـي بالحسـن والله قلبـي تأسرينـه

تايهٍ في بحر زينك ما ضوى على الكون زيه

الله .. الله مـن جمـالٍ فالمُحيّـا تملكيـنـه

ما خذٍ عقلي وروحي ومشعلٍ بالروح ضيـه

أشهد إن اللي نظركِ يـا منايـا تحرجينـه

بين طول..وبين زين..وبين عين..وبين هيّـه

وكل حرفٍ في جمالك لازم إنـك تعذرينـه

تاهت لحون القصيدة والحـروف الأبجديـه

هذا قلبي همس ودي داركِ اللـي تسكنينـه

فيه حب..وفيه ود..وفيه شمس..وفيـه فيّـه

ما وهبته شخص ثاني وأنتِ اللي تعمرينـه

وحبكِ اللي قد ملكني مرخصٍ له نفس حيّـه

و يا حياتي ما تبينه مـن عيونـي تأخذينـه
هذا قلبي بيـن يديـه للغـلا أجمـل هديـــه