الغلا منك وفيك

اسمحي لي يا جروحي بأكتب بدمك شقاي

اسمحي لي يمكن اقدر لا كتبتك اعتنيك

ضاع عمري بين ياس ٍ يحرق القلب ورجاي

ما قدرت اخفي طعون القلب يوم إني اجيك

يا مرامي كل بيت ٍ صادق ٍ يكتب وفاي

وكل حرف ٍ لا كتبته امسحه ثم احتريك

وكل نبض ٍ في عروقي يرفع الصوت بنداي

وكل همسه من خفوقي دايم ٍ تبكي عليك

وكل صوت ٍ لا سمعته فز من قلبي عناي

وكل حب ٍ لوعرفته اتجه يمك يبيك

وكل عين ٍ ساهره بالدمع توصف لك عزاي

وكل عبره سايله من فوق خدي ترتجيك

لا طرى ذكرك ببالي قمت اهوجس من بلاي

واتذكر كل يوم ٍ كنت انا فيه احتويك

ولا لمحت انوار قمرى شارقه والله بسماي

صرت اشوف النجم واجد بس كله يشتكيك

لا تزيدين القطيعه تممي لحظة لقاي

واكشفي عن حب صادق من عذابي مبتليك

وإعرفي ان الورود الذابله تشرب ضماي

وافهمي ان المفارق ينتظر موت ٍ وشيك

واعرفي ان الصراحه فالمحبه مبتداي

وافهمي ان الحقيقه فالهوى اني ابيك

الغلا يابنت والله لو تعرفينه غلاي

ما تبعت الا هنوفي لو تجي ذيه وذيك

يكفي إنك في هجير البعد ألقاك بك دفاي

ويكفي إني بالذهب والمال والروح افتديك

كل شيء غير حبك أحذفه دايم وراي

وكل قلب ٍ غير قلبك لو تعنى مقتفيك

يا مرامي يا غرامي يا زعل قلبي ورضاي

كل عرق ٍ من عروق القلب اصبح في يديك

حركي قلب ٍ تعذب من بعادك مع قساي

وارسمي سهم العيون بجانب القلب الهليك

واعرفي انك حياتي مبتداي ومنتهاي

ابـتـديـتـك بالمحبه وبالمحبه بأنـتـهـيـك

وابتديتك في ليال ٍ الهوى فيها هواي

لين أصبحتي عزيزه والغلا مـنـك وفـيـك

جبت لك كل الصراحه واغفري عثرة خطاي

والمحبه راس مال ٍ بـيـنـنا يا أغلى شريك

بعد حبك صرت شاعر أنتظر لحظة صفاي
يمكن أقدر يا غرامي لا كتبتك أعتنيك

زائر

ضاع عمري بين ياس ٍ يحرق القلب ورجاي

ما قدرت اخفي طعون القلب يوم إني اجيك
بعد حبك صرت شاعر أنتظر لحظة صفاي
يمكن أقدر يا غرامي لا كتبتك أعتنيك

الله ياكناري

قصيده حلوه

تقبل مروري