دارميااااااااااااااااااااااااااات

الدارميات
الدارمي, أقصر قصيدة في ديوان الشعر الشعبي العراقي. لكنه يحمل في ثناياه مضمون قصيدة طويلة لغزارة معناه فهو يرفض الضعف في صياغته ويعتمد العمق في ابعاده والدارمي الذي يسميه البعض (غزل البنات) هو على شكل حوار كما ياتي

محاورة شعرية بين طالب وطالبة واستاذ:

الطالب : بالصف افكر بيج وعن درسي فاتر

واسمج كتبتة بشوك فوكَ الدفاتر

الطالبة: امن الجامعة للبيت وانت على بالي

وبكل صفحة يالمحبوب وجهك يلالي

الاستاذ: الحب يدفع الانسان لاعلى المراتب

ويتبرة منه الشوك لو طلع راسب

الطالب: انه ادري يا استاذ للعاطفة احدود

والواجب اخليه للدرسة مشدود

الطالبة: حب الوطن يا استاذ من حبنة اكبر

نريد انتفوق دوم وبالعلم نسهر

الاستاذ: ولدي المحبة احساس والعلم بابة

ويندم هواي هواي اليهمل كتابة

محاورة بين عشاق:

هو: ابسد شجرة التفاح مشتولة روحي

وبالفركة حتى الطير ناح على نوحي

هي: اجيتك ومن ابعيد سبكتني روحي

ومن لمست الجفين طابن جروحي

هو: لا كلبي نوبة ايهيد لا عيني تغفة

لا صبر بيه يفيد لا ناري تطفة

هي: اتمنة روحي اتصير نجمة وترابيك

وبهيدة تالي الليل انزل واشم بيك

هو: اتمنة اهل الشوك يلتم شملهم

والطرب والاشعار اتبرع الهم

هي: اهل الهوى ايكولون كلهم مساكين

وعدهم الف تفسير لو رفة العين

حوار بين ام عاشت في زمان الحب وابنتها التي عاشت في زمان المال عندما جاء رجل يحبها لكنه لا يملك المال التي كانت تحلم به :

الام: يمه الاجه ابن جواد موش ابن غربة

اصل الستر والطيب واصل المحبة

البنت: اليخطبني لازم كون انه الاريده

عنده قصر واموال وسويجه بيدة

الام: ابكبرج واجه الخطاب كتلهم ارضة

جابولي خام الشام والحجل فضة

البنت: يمة زمانج راح بيه انظلمتي

وذاك الوكت مرفوض مو مثل وكتي

الام: عشنا بوفة وبطيب كل الليالي

لازفة لاكنتور.... لامهر غالي

البنت: اعرف بنات هواي عزن نفسهن

اتكلف كذا دينار بدلة عرسهن

الام: اشرايج لوَن زنكين عالحسن حبج

وملج بعد شهرين واعلينة ذبج

البنت: بنتج بعدها اليوم حلوة وزغيرة

مو مشكلة من يروح يخطبني غيرة

الام: بس كلمة عندي وياج ولله شهادة

بالوفة وبالاخلاص سر السعادة

البنت: اخر كلام وياج متطورة انه

والما يجيب المال شلي بحنانة

الام: اختاري والله اوياج يا سلوة العين

امج واعرفج زين باجر تندمين

يحكى ان رجلين كانا على خلافٍ دائم بسبب المواشي. وشاءت الصدف ان يحب ابن الرجل الاول بنت الرجل الثاني. وبعد عناءٍ تكبده الولد في اقناع ابيه ذهب هو وابوه مع مجموعة من (المشاية) الى بيت الرجل الثاني ليطلبوا يد الفتاة ولكن والدها رفض اعطاءها كما ياتي:

والد الفتاة: شلي بحلالي اليوم لو صبح واشي

اعذرني يا ابو فلان واخذ المواشي

والد الفتى: ياخوية انه وياك باجر مرحلين

خنجر عليش تصير بين المحبين

فقررا الوالدان ان يحمعا بين الشابين ويستمعى الى حديثهما عن الحب فوقفت الفتاة خلف الستارة:

الفتى: اثمرت هاي الكاع للبيها متعوب

وخضرت سنبلتين مابين الكلوب

الفتاة: اي صدك سنبلتين شوك ونداوة

ولمت شمل خصمين بعد العداوة

الفتى: اتكربنا صدكوا نريد نتكرب اكثر

اكبار وصفيتوا احباب واحنة نتمرمر

للوردة دمعي الماي بسكوت اساجي

اتعطشونة واحنة فروع من السواجي

والد الفتى: اشرايك يا ابو الديوان يالهمي همك

نمشي ونعوف الزاد.. لو حلها يمك

والد الفتاة : يحرم علي الزاد لوما احلها

من هسة تمشي وياك وابنك رجلها

تابع احد الشبان احدى الفتيات فقال لها
كاع انه وانت الطير لابد يحط يوم
لو تتعب الجنحان لو ينكرك حوم
فقالت له
كاع انت وانه الطير وتظن احطن
لو تتعب الجنحان .. بالماي اغطن