يكولون السياسة فنون كلما تنقفل ينفتحلك باب
يس احنا سياستنا ذبح من الباب للمحراب
فضائيات عدنا بكد عواء الذيب طحولك علينا بين طيب وطاب
وتيارات عدنا بكد نفوس الصين وبكثر الكصب والبردي عدنا احزاب
وياهو التلزمة يكول أني الزير وغير محيل وجذاب
باعوه الوطن تفصيخ بالمزاد حمل شيل غير احساب
اهو مال ابوهم حتى ما يبيعوه كل الي اجوها اغراب
أخوي الكردي يطالب راية استقلال وحق ابن الجنوب اريدلا طلاب
وابن بغداد عايش يس على التفخبخ والتفجير يذبح ركبة الطلاب
ماعاد اسمك ياعراق عراق يسمونك وطن أرهاب
ما يقبل علي سنة عمر تنعاف ولا شيعة علي بنكرها أبن خطاب
من الله خلقنا بهل الوطن خوان سنه وشيعه فرد كتاب
ما أكلك تصاهب هذا حجي اليوم بس دقق عليناوراجع الانساب
كلنا من ظهر واحد نسل عدنان لو قحطان ودين اهلي السمح ومشرع الابواب
سوانا طوايف ناس تاكل ناس وسونا شريعة غاب
مو هذي ثقافتنا وحق الله هذي فكرة الاجناب
اذا دستورنا ماضية جلبة بوش عليمن بعد والمن تجتمع جمعية النواب
اصحو ياعراقين كافي النوم مو بأطول نخلكم حطب الحطاب
وباعوكم زمر من حيث لا تدرون وانتو على النوايب لافين انكاب
وين اهل السماوة وثورة العشرين وين اهل العمارة وبصرة السياب
وين اهل الناصرية الي بيهم النخوات وين اهل النجف كوام داح الباب
وييييييييين اهل كربلا انصار ابو السجاد وين اهل بابل حلة الاطياب
وين اهل الديوانية وربعة الشعلان وين اهل الخيول اللوتلها اركاب
وين اهالي الكوت واهل الحي وين اهالي ديالى والمشخاب
وين اهل الرمادي وفلوجة الشجعان وين اهل سامرا واهل تكريت والشرقاط واهل الزاب
ويييييييييييييين اهل نينوى والموصل الحدباء وين اهلي بربيعة الداكين اطناب
وين اهل كركوك عرب تركمان اكراد شدة ورد عاشو بالعراق احباب
وين اهل سليمانية واهل اربيل واهل دهوك اهلنا جبال ماصاعد عليهم ناب
صدك ترضون بتراب العراق ايصر ثلث اجزاء وحصة يصير لهل السلب والسلاب
وانتو قومتو القيامة بأم قصر من رادو يعبرون وصنعتوا من الضلوع حراب
شجاكم خوفوكم فرخ ابن تكساس جنتم روس ياوسفه صفيتوا اذناب
لا سنه ولا شيعه العراق اسلام والاسلام دين اهل الكرامة وغيرة الاجداد
مكونات ياعراق الخير موش اهواي تركمان وكلد واشو وعرب واكراد
تفدرلتو والفدريلاكم فدريلاه البين جنتو جمع صرتو افراد
اذا عن النفط تحجون عمي النفط عدكم صار والبيه زود يوصل عكرب العداد
واذا عن الصنم تحجون عمي الصنم طاح وراح ونحاسه انباع بالمزاد
واذا عن الكراسي فالكراسي هواي بالخضراء واليكعد عليه يكون ابن غيرة وشرف وابن اجواد
على ياملة ذبحتو الناس كل الناس واطفال العراق ميتمة وتنكاد
اريد احجي احجاتي لله والتاريخ ولو مبعد عليهم واهلي عني ابعاد
لا بصرة ولا اربيل يبقى اسم العراق عراق تبقى العاصمة بغداد تبقى العاصمة بغداد