زنجيل زهيري

موضوع: زنجيل زهيري الخميس سبتمبر 18, 2008 5:12 am

ويه الشمس والكمر ربج بحسنج قرن
وعيوني من شوفتج صدكيني والله قرن
آهات بيه وشجن وعيونج الهن قرن

وبيوم بعدج عمه صوب عيوني والم
مبعثر آنه جنت حبج جمعني والم
انساج كالو جدذب ماضن يحلوه ولم

عسر فركاج الي يالجان حبج يسر
ملجاج اليه فرح دلالي من يسر
جسرج صعب معبره ما أضن مثله يسر

لوغيري دش الجسرلاماأضنه وصل
والروح من فكرتج صدكيني صارت وصل
والكمر من بسمته كام وكتبلج وصل

انساج لو فكرت ودج يعتني ورد
دلالي من الضمه بسراب مايج ورد
يكحيله يمورده ماضن بعطرج ورد

لاهيل هذا العطر لاهو ورد لامسج
رادو لعد غيرج اسج لا مسج
واغتاض من الهوه جف الهوه لامسج

مجنون هذا الهوه رايد لطولج يمس
يالمعندنج من ذهب يا در صفاتج ياماس
اليوم نوح وحزن رد ليه خايب يمس

وشفيفج من عسل والبيهن اطيب لمه
فاجئني حبج واجه ما ادري ليش ولمه
انساج يمكن صدك تدرين يمته لما

مثواي يصبح كبر والدهرلسمي نسه
يمدوخه كل البشر يالماكو مثلج نسه
والباري من صورج خلاج جن ونسه

خميت كل البشر ماشفت مثلج انس
ولزادي صرتي ملح لكليبي انتي انس
منياي منج اهج بهدومي واشرد وانس

طبع الهجر بالبشر ما ندري صاير سنه
وناري من وجرت بالصين شافو سنه
ساعات هجرج محن كل ساعه جنهه سنه
وكل يوم في فركتج مشئوم جنه قـــــــــــــــرن