لآلي تتناثر

موضوع: لآلي تتناثر الأربعاء أغسطس 12, 2009 6:48 am

تذكير بمساهمة فاتح الموضوع :

بسم الله الرحمن الرحيم
احبتي يا اشباح منتداي
ايها الثكلى ايها الجامدون بلا حراك جئت لاتوسطكم اليوم واهتف باعلى صوتي موتو لا ابقى الله منكم نفرا على قيد الحياة وان صحوتم فانظرو الى نور الحياة المتجدد .
لقد وجدت تؤم روحي وجدت من يتكلم بما اشعر به بما عجزت انا عن قوله للاخرين لقد عثرت على توؤمي في احد المنتديات وها انا الان جئت بما خطته تلك الانامل الماسيه بكل امانه وارجو ممن يصحو منكم عدم الرد على الموضوع وتعكير صفوه دعوه انه موضوع خاص بي ساحذف اي رد يأتي هنا ما عليكم ايها الاشباح هو المطلعه والاستفاده هذا لو كانت لكم عقول

الموضوع
ــــــــــــ
السلام عليكم ورحمة الله وبركاته
مابعرف ليه خطر عبالي اعمل هالصفحة واكتب فيا شو بيجي عبالي بلهجتي ومش بالفصحى حتى كون مرتاحة وعبر اكتر بحرية بتمنى ما تلاقوا صعوبة بتعبيري

رح عرفكن عن حالي
اسمي (لحظة صمت) لاني بعشق الصمت واحلا لحظة عندي لما بكون ساكتة لوحدي وما حدا عمبنقر فوق راسي يعني بيزعجني

عمري بصراحة بنسا ادي لان بنظري العمر هو عمر الروح لما نكون من جوا شفافين بيعكس هالشي على وجنا ومهما كبرنا بالعمر لازم نخلي لو مساحة زغيرة للطفولة اللي فينا لان لو نسينا الطفولة رح ننسا اشيا كتير واول شي البراءة (يا الله ما احلا هالكلمة) بصراحة ما عدت شوف حدا برئ ما بعرف الدني شو صايرلا الناس كلا محت كل شي حلو جواتا وقليل كتير الناس اللي فيها شوية طفولة بس بضل في الاشخاص لمنيحة والطيبة والاخلاق العالية اللي متلكن وصدقوني ما عمجامل هالشي من قلبي

صرت عمحس ان هالمنتدى بيتي مش صفحة بفتحا ولا اسماء مكتوبة كل حدا فيكن هون صرت بعتبر شخص عزيز علي وكاني بين اخواتي
وان شاء الله منضل هيك دايما

وجعتلكن راسكن بحكياتي بس انا انبسطت كتير لان سمعتوني وان شاء الله رح احكي اكتر معكن واصرعلكن راسكن بالحكي هههههه

ساعود لخاطرتي
ساعود لذاكرتي
ساعود لطفولتي
الى حيث الاحلام والامل والبراءة

تعلمت ان اكون امراة تتحدى الصعاب
تعلمت ان الصبر مفتاح الفرج
والامل نهاية العذاب والالم

اشتقتلكن واشتقت لهالركن اللي بيسمعني دايما وبينتظر اكتب فيه وارمي همومي عليه .
بصراحة انا حبيت هالمنتدى كتير وكل عضو فيه اخد جزء من قلبي وصرت بحس اني بين اخواني واخواتي الله يخليلي ياكن وما يحرمني من حدا فيكن

بشتقلك حبيبي كل ساعة وكل دقيقة حتى وانت حدي
بخاف من الزمن يبعدني ويتركني وحيدة
بخاف من النسمة اللي بتمرق من حدك تحملك وتطير فيك
ئللي كيف ببطل خاف وانت مالك روحي وعمري وسنيني
ما بدي شي منك انا بدي تضل حدي يا قدري وثورة حنيني

الجرح مش بس بيجرح الجرح مدرسة بعلم فينا وبعلمنا كيف ندواي حالنا ونرجع نبلش من جديد ونتعلم من اغلاطنا
انا من الناس اللي الجرح معلم فيني كتير وعلمني اكتر واكتر

وعأد ما اتعلمت عشوي بفتح مدرسة ههههه وهالشي ما بزعلني بالعكس صرت انسانة ثقتي بنفسي قوية وبعرف كيف اتصرف مع الاخرين واخد حذري ومن اول نظرة للشخص الاخر بعرف شو بدوا مني

بس رغم هيك ما تغير قلبي يعني ما عرفت احقد ولا عرفت اكره تركت قلب الطفلة جواتي اللي بحب بصدق وبيعطي بصدق والكره ما الوا مكان فيه

واي شخص طلب مني سامح بسامح وحتى اني بنسا بشو كان مزعلني يعني بفتح صفحة جديدة
لان الحياة قصيرة كتير وما بتستاهل نزعل ونحقد بس اللحظة اللي بتستحق عاتب حدا فيها وحاسب على غلط اكيد ما بقصر لان في اشخاص للاسف ما بتمشي معن غير هالطريقة

لما حدا يزعلكن اعطوا الف عذر وعذر يمكن ما كان قاصد هالشي عاتب. العتب بشيل الحقد وبوضح الحقيقة

وما تصدق حدا بيجي بيحكيلك عن صديقك او جارك الا اذا كنت متاكد انت بنفسك من هالشي
في اشخاص هواية بالحياة ان تفرق بين اتنين قلبن على بعض وبحب بعض كتير

صارت الدني مزيفة او الناس هي اللي مزيفة يعني ما بأ يفكروا الا بالمظهر وهيدا شو لابس وهيدا شو راكب سيارة وهيدي وين بتروح كل يوم وما بيتركوا حدا بحالوا

ما بدي كل كنوز الدني ولا بدي قصر ولا بدي صير بالمال غني
بدي عيش ببساطة وبالي مرتاح وانسا كل هموم الدني

جرحي غميق وهمي كبير
بس انا عندي رب كبير بيقدر بلحظة ينسيني همومي وجرحي حتى بلحظة يطيب

بحب الورد كتير كتير كتير كتير
واحلا هدية اجتني وردة حمرا من صديقة عزيزة على قلبي من 14 سنة ولهلا بعدا الوردة بمحلا
الوردة يبسوا وراقا وصار لونا بدل الاحمر اصفر بس بعد بقلبي عطرا وبعد لون وراقا

واكتر شي بيسحرني عطر الياسمين اللي اوراقا ناعمين كتير لدرجة اذا لمستا ممكن تتمزق ورغم هيك اذا بتمرق من حدا عطرا بعبي الدني .

ياريت فينا نكون شجر ياسمين تنسحر الدني باحلا العطور

شو بتمنى كون وردة بايدك تضما
وتحملها بحنان وجنون لحتى مرة تشما

الصداقة اجمل مرحلة بحياتي
كان عندي اتنين اصدقاء بالمدرسة بس
من بين كل البنات ما اخترت الا اتنين والباقيين كانوا مجرد رفقات بالصف وبالملعب المدرسة

كنت حس ان انا وهني 3 اجساد بروح وحدة كل شي اسرار عندي وعندن نعرفا وما حدا يخبي عن التاني شي

كانت اجمل لحظات حياتي لما كون مع وحدة منن

وما بنسا ايام العشناها سوا يمكن هني هلا نسيوني ويمكن بيتذكروا اسمي بس اللي متاكدة من انا اني بعمري ما نسيت اغلا صديقتان على قلبي

تخيلوا ان انا الي هلا 11 سنة ما شفت هالبنتان بس بعد شكلن وصوتن وكلامن مطبوع بقلبي متل الوشم لما ينرسم عالجلد

لكل حدا فيكن عند صديق حقيقي غالي على قلب
لا تجرب ابدا تسمح للظروف تبعدك عن
حافظ على علاقتك مع لان صعب كتير كل يوم تلاقي صديق حقيقي
واحيانا الصديق الحقيقي بكون اقرب الك من اخوك او اختك
وحتى من نفسك انت

شو حلو نكون ايد وحدة عالمصاعب عالمتاعب
عالهم عالجرح عالعدو عكل شي صعب
خلينا نتحدى الحياة بكل شي فيها سوا انا وانت
وما نخاف من لحضة ضعف او لحظة يأس طالما انا حدك رح نقدر سوا نخطيها

اه كم انتظرت طيفك الارجواني المتلألئ على شرفتي
وجعلت ثيابك غطائي في البرد وعطرك انيسي في وحدتي
ورسمت وجهك على الجدران وعلى الاسقف وعلى كل ابواب بيتي

امتزجت مع كل دقة من دقات قلبي
واحتليت عقلي وتفكيري
التحمت مع جسدي وصرت انفاسي واحتياجاتي
يا سهلي الاخضر يا مروجي يا كل بساتيني
فيك ابتدأت عمري وفي حبك ستموت احزاني واهاتي

احملني حبيبي لابعد مدى
خلي صوتنا هو الصدى

رحلتنا سوا نعيشا وما يزعجنا فيها حدا

اول ما فتحت عيوني عالدني لئيت حالي عايشة بحرب واتهجرنا من منطقة لمنطقة

واتخيلوا من انا وطفلة كنت افهم شو يعني قذيفة ووشو يعني صاروخ وشو يعني الخوف

بعدا اصواتون بدينني وبعد الرعب مزروع جواتي وكل ما بتذكر بحس نار وشعلت فيني

بعدوا صوت امي بدينني لما تبلش القذايف كانت تنطر خيي عالبلكون وهي عمتبكي وما تفوت حتر يرجع عالبيت

وكان شكل القذايف متل الالعاب النارية لما بكون في فرح او مباراة

عشت اكتر من مرحلة حرب وحدة
اتخيلوا ان انا هلا اذا سمعت صوت العاب نارية بفزع وبرتعب وبصير قلبي يدق بسرعة برجع بلحظة الفيلم كله بذاكرتي

انا قلبي مع اطفالك يا غزة
قلبي مع كل مجروح وكل مهجر وكل مدبوح
وكل ام بكيت عولادا وكل بيي خسر عيلة وصار وحيد وحزين
قلبي مع اطفالك اللي ما عرفوا الطفولة وكانت العابن حجارة وقذايف تلعب فيهن تيصيروا متل الطير المدبوح

انا بحس فيكي يا غزة يا قلب مجروح وعيون بتدمع وما بتعرف بالحزن تبوح
بحس فيكي لما تعتبي علينا وتقولي وين العرب وين السيف وين الصوت اللي صار مبحوح

نحنا ولا يوم نسيناكي ولايوم اتركناكي بقلبنا صلينا وادعينا لاالله يحميكي

بس شو طالع بالايد وكل يوم وفجر جديد النخوة عمببتموت فينا والعرب صاروا متحضرين فكرون هيك العروبة بالسلام بيقدروا يرجعوا فلسطين

فلسطين يا دمعة طفل وهم كبير بقلوب محبينك

فلسطين يا غربة كل حزين ومتهجر تارك بلاد وبدور عمكان جديد

خلونا نعيش بسلام بكفي حرب بكفي كلام

تعبنا نخاف تعبنا ندور على نور يضوي عتمة ليالينا

اتركوا الاطفال والعابا خلوها تنسا لحجارة

وتلعب ببركة مي محطوطة بألب دارا

شو بدي احكي بعد اكتر صدقوني ما بيعرف هالاحساس الا اللي عاش فيه

احساس ان بيوم رح ترجع عبلادك وما تلاقي بيتك
وتفتش بين الردم يمكن تلاقي صورة الك او صورة الاخواتك

يمكن تلاقي كتاب وراق احترقت او كرسي كنت تحب تقعد عليه

اخ يا زمن شو انك قاسي حطيت فينا كل الماسي
وخليتنا نتخبط بالموج وسرقتلنا كل المراسي

الحياة علمتني كتير واكتر درس اتعلمت هو الغربة
الغربة مش لما تسافر من بلد لبلد وتبعد عن اهلك
وتعيش بوطن مش وطنك وبين اهل مش اهلك

الغربة هي لما تكون عايش بوطنك وبين اهلك وانت حاسس انك غريب

اصعب غربة لما تكون قاعد بين اهلك وهني بيحكوا وبيضحكوا وانت حاسس انك بيناتون غريب

شو صعبة يا امي كون عنك بعيد
من دونك الدني غابت شمسا وما رح تشرق من جديد

اشتقتلك يا لحظة شوقي وكرمالك بدفع عمري تشوفك من جديد

عندي حكي كتير كان بدي قولوا واهمسلك فيه
عندي حنين والك في بقلبي شوق كبير

اه يا امي باحلامي بشوفك عطول وبفيق من الحلم وياريت من الحلم ما صحيت

عندي قصص كتير بدي احكيلك هي
عن مراهقتي وعن شبابي اللي صار بدونك خريف
بدي قللك اني بحبك بحبك بحبك يا امي كتير

كل ما كبرت وكل ما البعد بيحرقني كتير
بدي شوفك بدي ضمك بدي عطرك اللي بحب كتير

بتتذكري يا امي لما كنت زغيرة كنتي تغنيلي كتير

وتقوليلي يا بنتي بكرا بتكبري وبكرا همك راح يصير كبير

وماتخافي رح ضل حدك وطالما انا معك مافي شي رح يصير

وشفتك بلحظة عني بعيدة بناديلك ما بتردي يا امي بعد عطرك عالق والله بقلبي

موضوع: رد: لآلي تتناثر السبت أغسطس 15, 2009 3:46 pm

ماهذا الجمال المتناثر...؟
روعة سطرت هنا بكل دقة
تسلم الايادي يارب
ليلى